比思論壇

標題: 2011年最新！職業性向測驗！睇下自己適合做邊行？ [打印本頁]

作者: 星座小公主 時間: 2011-7-14 17:32
標題: 2011年最新！職業性向測驗！睇下自己適合做邊行？
2011年新既畢業生對前景係唔係好徬徨？唔敢肯定自己係唔係有人請，亦都唔知應該

做咩好？應該繼續讀書定打工？揀份人工高既定係無咁悶既好？呢個心理測驗分析你

最適合做邊一範，等你唔會一起步就行錯，入錯行浪費時間！

作者：晴羊舞

1. 以下邊項工作最痛苦？

A: 搜集人妖既相片並且解釋點解覺得靚或者唔靚 ->2

B: 去銀行將五千蚊紙唱做五毫拎番公司 ->2

C: 明明係Winning高手，但係要特登輸比老闆 ->2

D: 每日係辦公室翻譯8小時既A片 ->2

2. 睡夢中，有個細路同你講話要過去對岸，但係中間有一條洶湧既急流，你會……

A: 將自己既身軀撐成一條橋，等佢踩過自己 ->4

B: 掟佢過去 ->3

C: 請佢飲RED BULL ->5

D: 叫佢等條急流慢落黎搵機會偷偷地游過去 ->3

3. 下列邊項工作你最有信心可以做得非常好？

A: 係限時內將大量資料歸納、處理、分析，最後匯報 -> 7

B: 進行訪問一邊留心受訪者回答，一邊快速分析佢既答案然後

　尋找蛛絲馬跡 -> 4

C: 憑印象將見過既風景以任何方式呈現番出黎 → 5

D: 熟練咁操作複雜既儀器 -> 6

4. 你既朋友通常會用咩詞語黎形容你？

A: 能言善辯 -> 5

B: 頭腦清晰 -> 6

C: 估你唔到 -> 7

D: 富正義感 -> 6

5. 你平時對以下邊一樣野最有興趣、最留意？

A: 時事新聞 -> 6

B: 環保資訊 -> 8

C: 身邊朋友既反應同埋情緒 -> 8

D: 新出既唱片 ->7

6. 一次偶然的機遇中，從國家特工的手中拎到一張一級機密，但發現只係一張白紙。番到屋企你將將紙用火烘，開始見到一D字，你覺得會係…

A: 一首回文詩 -> 7

B: 某公司既財務報表 -> 9

C: 某政府官員既精神健康報告 -> 11

D: 離子炮的操作說明書 -> 8

7. 入到一間高級既3D戲院，戲院老闆請你免費睇一套戲，你會最想睇……？

A: 唔洗佢請，你會用錢收購佢成間戲院 -> 15

B: 歷史紀錄片，黑白個隻 -> 11

C: 宜家最新最潮最3D既一套戲 -> 9

D: 睇肉蒲團，但要睇吳啟華主演個套 -> 8

8. 夜晚係大學宿舍遇到一隻淒厲既女鬼，佢一定要睇一D精彩既野先肯放你走，你會……？

A: 用IPAD播番午夜兇靈比佢睇 -> 16

B: 即席揮毫，七步成詩比佢 -> 10

C: 唱你最拿手既K歌比佢聽 -> C

D: 話俾佢知咁樣係唔O巖既，用言語嘗試超度佢 -> 9

9. 以下邊種挑戰對你黎講最容易？

A: 勸一個自閉癥既小朋友學跳芭蕾舞 -> 14

B: 分析唔同動物既行為模式 -> 13

C: 去廟街講價，講到檔主免費送件貨比你 → 15

D: 五分鐘內背熟唐朝所有君主既名 -> 10

10. 你番番去古代，但係得罪左皇上，皇上要困你係牢房十日，期間你會……？

A: 望住窗外既藍天與草原-> 11

B: 睇易筋經 -> 13

C: 用算盤計數 -> 12

D: 清潔牢房 -> 11

11. 你變左做一個太空人同拍檔去火星做任務。對於今次既探險，你最擔心乜野？

A: 政府既人會番黎將自己殺人滅口 -> B

B: 流失數據，令到政府同國家蒙羞 -> 14

C: 任務失敗，損失數以百萬億計 -> 12

D: 支火箭唔夠快，比鄰國既太空人捷足先登 -> 15

12. 你同四個朋友食蛋糕，但點樣先可以切三刀又分得均個蛋糕呢？

A: 自己唔食，一刀切空氣，另外兩刀切個蛋糕成四份比佢地食 -> 13

B: 一刀殺死其中一個朋友，另外兩刀切個蛋糕成四份大家食 -> 17

C: 買多四個蛋糕，唔好煩 -> 16

D: 等佢地自己想辦法->14

13. 你覺得你前世係咩古人？

A: 邊個都唔係，我就係我！ → 17

B: 華陀 -> 14

C: 高級太監總管 -> 17

D: 李白 -> A

14. 同一大班朋友去唱K，點知你大破音，個個都望住你，呢個時候你會點樣完場？

A: 係呢度既音響太差 -> 16

B: 首歌本來都係咁架 → 15

C: 望咩呀望，今餐我請架喎！-> 17

D: 咩都唔理，繼續唱落去 -> 15

15. 當你參加社交聚會既時候，你會……

A: 主動結識新朋友->16

B: 坐埋一邊，等人搭訕->17

C: 只係同相熟既朋友傾計->16

D: 咩人都傾下，總之要搵最值得結識既朋友→ 17

16. 你最享受邊種生活？

A: 能夠燃燒自己、照亮他人既生活-> 17

B: 能夠多D唔同既人接觸交流-> 17

C: 無拘無束自由自在既生活-> 17

D: 悶一D都唔緊要，至緊要安穩既生活-> D

17. 以下邊種成果對你黎講係最重要既？

A: 掙既每一分錢都係自己既-> H

B: 自己可以影響其他人既決定->  E

C: 能夠委身服侍其他人→ G

D: 以財生財，快速累積財富->  F

結果:

A - 學院型

你始終保持住孩童一般既好奇心，但經過多年黎既教育你既學術水平已經達到一定水準。對你黎講，你未必想踏出社會去打工，因為你會覺得係社會講野都只係錢錢錢。對你黎講知識就是力量，最重要都係學多D野，繼續分析同埋研究。學院始終係你得到最大滿足感既地方。

B - 媒體型

呢一類既人同溝通型既人性格有D重疊，都係溝通能力同埋語言好好既人，但係佢地通常更加富正義感，經常對身邊或者社會既事憤憤不平。佢地希望將最新既消息話俾人知，等佢地去批判或者評價呢單新聞。話到明媒體，佢地最適合當然係電視、電臺、報紙、雜誌、廣告等。此外，做教育、同文字有關既工作，例如教科書編輯呢D都算係沾得上關係。需要留意既係呢一類工作雖然可以獲得第一手資料，但係往往需要有所犧牲，投入大量時間同埋心力。

C - 靈媒藝術

你一定聽過人話你神神化化，但其實只係你諗野既方式同其他人唔同；其實你份人好有藝術天份，對於靚既野你會比一般人更加投入，而且思考方式獨特有創意，好多時都會有人地諗唔到、出人意表既意念。另外，你興趣十分廣泛，只要係同個靚字有關係既野你都會盡全力去做。不過要留意既係藝術人往往多愁善感，要你既工作唔受情緒影響係天方夜譚，而且你亦都非常相信直覺既判斷多於理性既分析。適合做既工作有室內設計、畫家、廣告、作家、記者、攝影師、鋼琴家等等。值得注意既係，單單有創新既概念係唔夠架，而係要學一門可以讓你發揮創意既技藝。

D - 實幹型

你做事腳踏實地，而且適應力強，對你黎講最重要既係安穩既生活。你最怕D野多變，令你感覺無所適從，因為咁樣你會捉唔到佢條路。反而重重複複既工作你日日做，點都搵到D唔同，對你黎講都係一種趣味。此外，你做野一板一眼，按本子辦事，可以令你感覺安全同埋有滿足感。實事求是既你亦都好享受一分耕耘一分收穫，靠自己實力一點一點累積經驗從而達至成功。適合你既工作包括行政管理、品質監控、機械操作同埋體力勞動既工作。但有時要注意諗野唔好諗得太死，偶然轉下彎換個角度黎諗，或者用一D平時唔會用既方法，可能會更加有效能解決個問題。

E - 溝通型

你份人待人友善，交際手腕圓滿，溝通能力同埋表達能力都相當唔錯，語文科成績應該差極有個譜。而且，你平時亦都鍾意同人接觸，識多D新朋友，所以一D要用到相當口才既工作你會頗為勝任，例如公關、律師、翻譯、教師、DJ等等。另外，你亦都係能夠一心多用同埋權衡利弊既人，平時同人講野既時候就已經會一邊講野一邊諗野，所以你亦都可以考慮一D好似社工、推銷、記者呢一類需要急才同埋小心講野既工作。你既優點固然係你既表達能力同埋懂得平衡多方面利益，但另一方面你亦都需要了解凡事無完美，如果諗得太多，算得太盡，只會將自己迫入死胡同。

F  - 分析型

頭腦清晰既你分析力超強，諗野理性、條理分明，會一步一步咁解決問題，而且能夠好快將有既資料歸納分析，好少受個人既情緒而影響決定。呢類人通常對數字同埋邏輯比較敏感，而且細眉細眼做野好小心，協調力強。好消息係有好多專業行業都需要呢種特質，例如會計、金融、工程師、醫生、核數、各種分析同埋研究人員等。壞消息就係有時太過理性，可能係同其他人處事，人際關係上面未必處理得好好，遇到同事有情緒方面既問題，你會感到不能理解，未必能夠容忍點解咁樣會影響工作。另外，一旦遇上需要創新或者溝通既工作，你都可能會一下子頭腦轉不過來。

G  - 服務型

你份人好多時都會為人著想，好客熱情，而且考慮周到細心，最適合做服務業既工作。講到服務業又唔一定係做基層既看更、侍應或者洗碗既，其實化妝師、金融保險員等都可以歸類為服務型。重點係個種肯為人設想犧牲既精神，樂於助人、合作性強既性格一定能夠為你爭取到唔少機會。

H  - 創業型

你嚮往無拘無束既生活，要你幫人地打工，你會覺得唔知自己做乜要花咁多時間幫人掙錢，感到非常不公平。而且通常你呢類人都幾富冒險精神，鍾意大膽嘗試，亦都幾有諗頭；所以如果資金各方面許可既話，其實創業做老闆對你黎講絕對係一條可行既道路。坊間有時亦都會有一D比人申請既創業基金，變相減低你一開始要投放既資金。但係要留意係諗同做係兩回事，單有概念同埋計劃書係唔夠既，而且每個行業係唔同時候都有唔同情況，記住唔可以一本通書睇到老，要經常保持敏感吸收新資訊，靈活應變，虛心學習，多D從顧客、員工既角度思考，咁樣先至有機會係瞬息萬變競爭激烈既市場中殺出一條血路。

作者: moon912 時間: 2012-9-16 21:37
有室內設計、畫家、廣告、作家、記者、攝影師、鋼琴家等等。值得注意既係，單單有創新既概念係唔夠架，而係要學一門可以讓你發揮創意既技藝。
作者: chixie1313 時間: 2012-11-8 11:16
天呐，你打的是什么字啊，我真心看不懂啊。

歡迎光臨比思論壇 (http://asicrs.com/) Powered by Discuz! X2.5